إبداعات

عاااارف يارب

شعر-مسعود شومان:

الله مقام الحال وروح الحاله

بيقولها واضحه وهى طالعه لك
متفرقة حرف حرف
من بق ست عجوزه بتشتكى للرحايه
من إيد بتعرق بس مش طايله الرغيف
فى بصة مجروحه لعيل فى الميدان
بيمد إيده بعلبتين مناديل
وصوته طالع نحيف
فى الليل إذا ليل على نفسه و خاف م الضلمه
عارف
أنا شوفت تحت البدله علب الصفيح
وبواقى الزباله
وشوفت بس ما قدرتش أقول
جبل ورافعه الدود وجناحه النداله
سارح بعكازى الخشب وبزك فى القياله
مع كل زكه السما تسمع دعاه
لو فيها عدل يا ناس
أنا كنت أشوف زكتى فى خطوة الخياله
بس الحكايه قديمه وشوفتها بعينى
ومين يقدر على النور اللى فى السياله
غنيت لحالى كأنى ناى الجدود
حاوطنى طيف من غير حدود
غرقنى فى نور الجلاله
وكل عكاز وصاحبه فى الهوا طايرين
ووسطهم دابوا الملايكه كأنهم واحد
الله
مقام الحال وروح الحاله
قاعد بنقى الحصى وباصيد كلام م الموج
ولسانى سر السؤال
وعيونى جهر القواله
الجمر تحت الجمر
الجمر فوق الجمر
ولسه فيه فى العمر
شوق الحروف للحروف
عشق الضلام للدلالة
الضل تحت الضل
معنى المعانى م الكلاب محتل
والرجل فاهمه وهى طالعه التل
رعب الهالوك لما احتمى بالسل
وعنيا شايفه الطابور
أنا قلبى من جنس الطيور
بيرف وياهم
والرهان ع النور
بتلحسوا ليه طين البرك
وانتو شايفين الشرك
يا حسره ع الرجاله !!!!

مقالات ذات صلة

شاهد أيضاً
إغلاق
زر الذهاب إلى الأعلى