إبداعات

زخات مطر

شعر- سارة زيادة:
زخَّات مطر
بتشُقّ جُوف الليل ..
تِسابق دمع سال ع الخد
والذكرى سِيل
والمُرّ فاق الحد
كل اللي فات
مرسوم على طين الطريق
بأغرس خطاوي القلب
فوق الشوك ..
وبارجَع ع الجراح ..وأمِدْ ..
والعشق فارد سَطوته
على شط قلبي المُستكين
قلبي الغريق
كان من زمان عَـوَّام
ولا نَـوَّه يوم
قدرت ف مَره تهزمه
فرس محدش لَجِّمُه
ولا اعتلى صَهْوِة هـواه .. إلَّاه
واشكيه لمين ؟
وكَـفُه شالي ومعطفي
ملفوف على العمر الحزين
تـِتـُوه عيوني الهايمه ف .عيونه
واشوفه بين سنين .عمري
اللي عَـدَّى وراح
نهار طالع بكل بَهاه
والقى ملامحُه الحلوه تشبهني ..
واشاهد بكره من شمسه
فرس جامح ..
يسابق نبض قلبي معاه ..
وبيخطي حدود يومي ..
ينَـفَّضْ عني أحزاني ..
ورعشة قلبي وهمومي ..
أغَـنِي لبُكره ويغني ..
أسابق ضَيُه يسبقني ..
أخاف الضلمه تسرقني
أخبي الشمس ف هدومي ..
تِنَـوَّر لي اللي مش شيفاه ..
أعيش ويَّاه ..
ولو تاهت خطاويَّا
كفايه علَـيَّا اتوه جُواه

مقالات ذات صلة

شاهد أيضاً
إغلاق
زر الذهاب إلى الأعلى