شعر- سعيد شحاته:
لو جا الطوفان حطوا العيال في الطين
قالوا زمان الكدابين لما الطوفان جاهم
أمثال نسجها شيطان لناس شياطين
وسابوها زي النار محاصراهم
ما شافوش طيورها بتحرت الفدادين
ولا وردها بيغسل خطاياهم
ما شافوش وجع قطه ف حنكها نابين
وولادها بين أنيابها شايلاهم
إنسان وجاني طوفان وانا ابن يومين
قام شالني ابويا وخدني وياهم
مر الطوفان وانا كهل في الستين
شلت الأمل .. ورمحت في حماهم
مين اللي قال لو جا الطوفان يا حزين
تسرق حبوبك من رحاياهم
لو جا الطوفان خلّوا العيال في العين
واستقووا بالنور واركبوا معاهم
يا الورد لو شال ورده ع الكتفين
الكدابين شايلين خطاياهم
قلبك مداين .. فيه بشر صاحيين
وعنيك سفاين لو طوفان جاهم
