إبداعات

كده عيب

شعر – مني عبد الرحمن:
مبقاش الزُّوق يِهتَم
بكل طبايع البني آدميين
والكلمة الحلوة بقِت تِهرَب
من كل كَمين
ومعاني كتير زيّ الأخلاق
والحُب وصِدق منَوَّر جُوَّه العِين
كلها سافرِت
وَرَا سُور الصين
مبقاش من كل حروف النِّدا
غير زِفت الطِّين
ومنَيِّل راح ومنَيِّل جَه
وانا لمَّا انْدَه
بتاخُدني الكلمة لبَحر ملام
إنتِ مُؤدبة يادي الأيام
يادي الأيام مش عاوزة كسوف
ولاتَغمِيضَة
خليكِ جَريئَة ومَسنُودَة
بجراءة عِين
تِنطَقي بالكلمة وتِتعاجبي
والحاجِب مِن فوق يتمايِل
يرمي خَيالُه فوق الخَدِّين
بقى يعني بعد ده كل العُمر
سنين…..
راح أنْسَى طبايعي واقول ألفاظ
تِسمَعها وداني تُقوم تِحرَق فِ لساني بجاز
وتطَّهر كل الهوا حَوَاليَّا ولِيَّا
الحَيا يرفُض ينحاز
أصل انا ماعرفش
لاأقول كلمة تهِز الأخلاق
ولابَعرَف برضُه أشاوِر حتى مشاورِة وِش
يمكن خِيبَة مِنِّي ف هذا العَصر
وغَسيلي نضِيف مش مِحتاج نَشر
ربِّنا يرحَمنا مْنِ العِيبة ومْنِ الألفاظ
بِتكَعبِل رِجلي وخَطاويَّا
وانا ماشية بتعانِد فِيَّا
يستُرها عليك ربي… عَليَّا
مِنْ دِي الدنيا
ويلِفِّنا عَفُّوه وغُفرانُه
لبَقِية العُمر

مقالات ذات صلة

شاهد أيضاً

إغلاق
إغلاق