شعر:ساره زياده-الأسكندريه-مصر
*****
وقالوا كتير
عن البت اللي جوه عيونها داب السحر
وعملوا عشان قُليبها يطب مليون سحر
وعملوا جنازه للاحلام
وقالو ان الحنين ميت
وقالوا وجودها كان اوهام
عليها سنانهم اتسنت
وقالو دي اعقل العاقليين
وناس تانيين قالوا اتجنت
وقامو الحد على روحها
لما ف مره يوم حنت
وقالوا معادش كاسيها الخوف
ولا شبح الوحده بيفزعها
والضلمه مهيش بنياب واشواك
والفجر بنوره بينزعها
القلب السارح في الملكوت
مش راضي يموت
مع ان النبض بيوجعها
