إبداعات

غنيه ناسيه البحر

شعر- صادق أمين، الأسكندرية:

اسكندريه والخريف نطفه فى ضهر الصيف
باسيبها واقعد على قهوة فى باكوس
يمكن يعدى الشتا ويدفع المشاريب
كأنى خارج م الحروب مهزوم
كان ليا صاحب بس مات م الحزن
مع ان سايد فى البلد بدعه
قالت بأن البحر مات م الضحك
اسكندريه غريبه مستغربه
عدى الحنان وفاتنى وقت الصبا
قاعد وحيد
والدنيا قفلت بابانها ف وش الوبا
باضحك ضحك اللى صابو الغبا
عجوز فى وقت مخيف
كأن كنت حصان وفجأة كبا
عصفور انا واقف
على سلك عريان وقلبى فيه كهربا
ومش شايف سواي
عيل صبابه غنوته
تشبه دموع الناى
مستنى يمكن حاجه ذى عيونك
او حاجه فى لهجه شفايف طعمها كونياك
حران وقلبى فى المسافات والطريق صقعان
عندى حبه ذكريات فاتحين
فاكرين جراءة فى ملمس الياسمين
أنثى أما غابت
ضاعت العناوين
كان نفسى املك قلب كان نساى
انا كنت ازرع فى السما بدايات
وأولد معاكى بدايه للحكايات
وكنت ابادل الفراق باللقا
طب كنت شوفى
حضنى يكون ازاى
جنه غيطانها من عنب وحنان
أغصان شجرها يحرسك ضلها
وكنت اخلى الوقت للمنتهى احضان
هى اللى كانت حلم نصه م التفاح
ونص تانى من شجر منفى
الساعه ماشيه لوحدها ع البحر
وقلبى عنده ساعه ما بتمشيش
دفعت عشرين سنه للفراق بقشيش
وضحكت ضحكه اجرتها وندمت
خسران خسارة واكدب واقول كسبان
واضحك بجد لوجانى عبالرحمن
عيل فى لون الندى له ضحكه مالهاش ذى
عيل غناه له طيبه الاحلام
يسألنى فجأة
يا بابا هات مصروفى
وافتح له قلبى يملا كفوفه حنان
خسران خسارة بس انا كسبان
الشعر لسه باركب
على ضهره واتمرجح
كانى فارس يملك حدود النار
يقدر يشكل ويلون الاحلام

مقالات ذات صلة

شاهد أيضاً

إغلاق
إغلاق