بقلم- الشاعر محمود الونش:
قالو البقية فى حياتك ابوك مااات
قالو راح وفاتلك العمر الطويل
قلت يرخص العمر لو يرجعه
ليه فى كل فعله وفعله الف جميل
فرقة الاحباب اكتر حاجة تكسر القلب وتوجعه
حبه يجرى فى عروقى كما النيل
ورغم رحيله صوته لساه ودانى تسمعه
ابويا ماله في الدنيا مثيل
كرم وطيبه ومجدعه
كان لو المال فى ايده قليل
ميغلاش عليه يدهولنا ويوزعه
لو يوم تعبت كانت ايده تشيل
وقولتى الاه كنت احسها فى قلبه توجعه
كان الحزن ما يعرفله سبيل
واللى يزوره مهموم بالضحكة يرجعه
كان يحب عشرة الاصيل
وقليل الاصل لا يجالسه ولا يتبعه
فى صغرى كنت اخاف لو على كتافه ليه يشيل
مكنتش اعرف ان اللى يشيله أبوه محدش يقدر يوقعه
فى الشتاء تحت عبايته كنت أحس الدقى بالليل
والله ما حسيت البرد غير وانا بودعه
الفرقة قتالة والنسيان مستحيل
وازاى انساه وانا حتى فى أسمى بتبعه
رغم مرور الزمن افتكره تلمع عيونى ودموعي تسيل
وكفوفى للسما توجه دعائى ليه وترفعه
اللهم فتقبل منى انا العبد الذليل
يا من تنزل البلاء وترفعه
