إبداعات

قصيده

شعر- حنان شاهين:
طفل انفلت مني و جري
و حلف ما يرجع لي
الا اذا 
فكيت زراير بهجتي
و حليت رباط شعري
و هربت من سور الزمن
و ندهت جن الريح
ياخدني معاه
لحدود بلاد …
فيها الأماني ممكنة
طب ليه انا
قلبي العجوز بانهج
و صوتي
زي ما يكون حشرجة
و حاسة بضيق
رغم اتساع الشارع اللي
كان واخدني لمنحدر
يم الغروب
فجاة اختفى مني و تاه
انا كنت خايفة و هو ياااااه
رغم انه صاخب فوضوي
مدمن حياة
و تملي يجري
بس عكس الاتجاه
يظهر في لمحة و يختفي
يحدفني طوبة و يبتسم
عشان أثور و اجري وراه
شخطت فيه عيب
اختشي سابني و مشي
اطلق ساقيه للريح و نادى :
حصليني
انا في المسافة الممكنة
بينك و بيني
انا عند اول سلمة
في طرف السما
قابليني
يللا عشان نلعب سوا
أنا هاستخبى جوا منك
و انت فيا تظهري
بس اوعي مرة تكبري
و تموتيني
ياللي انت مني و كنت فيا تعيش
ازاي دبل قلبي و طلع لك ريش
شاور على قلبي و مشي
و كأنه ما سمعنيش 

مقالات ذات صلة

شاهد أيضاً
إغلاق
زر الذهاب إلى الأعلى