إبداعات

تخاريف

شعر-ساره زياده:
الحزن بيوقع نجوم
والذنب مهما نلبسه
من غير هدوم
وانا عمر قلبي مانخ يوم واحد لموت
ولا عمره كان م الخوف
بيلتزم السكوت
وبرغم ده
عاملاله بردو كتير حدود
عنيد ووقت الحزن
يرفع ميت شعار
يرسم نهار
يبدر شقاه
يتمنى يطرح يوم حياه
ويدور ف نفس الاتجاه
القاه طرح تخاريف
وقت الوجع هتيف
وتعبنا م الشعارات
ميت الف سقا مات
والعبره على الموته
خالصة يا حدوته
من قبل بدايتها
مفتوح لها ميت قبر
من قبل يوم موتها
مين قص ضحكتها
بلل كفنها صبر
ما هي اصلها ناقصة
دلل هنا يا دلال
نزلها ف مناقصة
مين راح يزيد الوجع
وبارخص الأسعار
اجمع هنا التجار
ووزعوا الجته
قسمها ميت حته
وسيب لها روحها
طيرها ف براحها
يمكن تعود تاني
تنبت ف أرض الله
وتلاقي مطرحها

مقالات ذات صلة

شاهد أيضاً
إغلاق
زر الذهاب إلى الأعلى