شعر- حاتم مرعى، مصر:
هايقضي عمره فى شوية حروب تافهه
يرص هزيمته
جنب هزيمة “جلجامش”
يلف ويدوخ
دوخة “أوديسيوس “
إزاى هايشوف كل شيئ
ويلم اللي فاضل
قبل مايتوه فى قايمة أسماء
إزاى هايتأكد له غباءه
وهو بينسحب م العالم
ماحدش بيجيب سيرته
غير شويه من أصحابه
فاقدين الوعي
هايحرق قصايده
ويسيب عنوان ل جنه
تناسب طموحه
السما إكتفت بدموع ملايكتها
والشوارع مافيهاش مكان لرجله
هايرفع إيده يحيي الناس
يمكن يذكروا محاسنه
وحضوره الدايم
عمر طويل ع الفاضي
ماشافش منه حاجه
