إبداعات

متر ذكري

شعر- سماح مشعل
وانت بتقرر غيابك
ميل على القلب إللى حبك
واقنعه يرضي بعذابك
خد معاك صورتك وساعتك
كل حاجه كت بتاعتك
خدها وياك فى انسحابك
واوعى تنسى وانت بتفضى فى دولابك
ترمى بين ورق الرفوف
كل ذكرى ليا جنبك
فرحتك ،،، حزنك ،،،، شبابك
دمعتك وقت اضطرابك
جيب سرنجة خمسه سنتى
ومن عنيه اسحب ملامحك
وأقنع الأيام تسامحك
خنت ليه عيشك وملحك
ده انت واخد فوق منابك
واطفى نور الأوضة ياللا
الوقت غاب
مش ح ادور عن أدلة
انه كان موجود وساب
عادى جدا لما تمشي
قبلنا حصلت كتير
قصة كانت صفحة واحدة
فصل محذوف م الكتاب
بس لما الذكري تهجم
يبتدى وخز الضمير
كام مفارق لما فارق
قال لعل البعد خير
شيلوا من ايامى بكرة
إحنا متر فى متر ذكرى
واترمت تحت السرير

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً

إغلاق
إغلاق