إبداعات

قلب قتيل هوى هجرك

شعر – محمد التمساح, مصر:

قلبك الطاهر

 ياقاسيه

ليه بيعصى

وليه بيتجبر

ويتشطر عليه ؟

وليه فى عنيكى

حبى المستحى

ملوهش ديه ؟

لا هو بيكدب

ولا صادق

ولا خافى ولا باين

وانا كل ذنبى

أنى معشقتش

وليف غيرك

أنا كل ذنبى

أنى مش مذنب

ولا كداب ولا خاين

أنا مش هفتش مشاعرك

عاللى خبيته ف مشاعرى

قلبى إللى مكشوف

ومتعرى ف عيونك

لو تلمسيه

هيشوكك صبر السنين

اللى انتى نسيتيهم

وألف مليون امتناع

وانكسار

كامش فى تحتيهم

فمتغرزيش سيفك

فى قلب قتيل

هوى هجرك

الا اما تنزعى

بدن الحياه

بحبك النابض

بصهد كاوينى

من جمرك

وتنزعى

 كل السهام

الراشقه

من زمن البعاد

وتطهرى

جرح قلبى القديم

قبل ماتقتليه

وتعيدى الكره

من تانى

ياقاتلانى

وانا صاحى .

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً

إغلاق
إغلاق