شعر- ساره زيادة:
انا مش ضعيفه
ولا عودي مره ح ينحني
ياما عواصف من هنا عدت
وما قدرت ف مره حتى تهزني
انا بنت راجل عاش جدع
راجل قوي
ماهو ابويا أصله عسكري
شامخ ورأسه فووووق اوي
ايده ما هيش طايلة الترف
لكن بالف من رجال هذا الزمن
تسقيه شقا
يطرح محبه بشوق و فن
دموعه سابقه ضحكته
وشبعت على طبليت
علمني اتحمل مكايد دنيتي
واستغنى عن اللي حيعصى فيها عليا يوم
فبقيت اقول وبعين قويه على العصي
ملوش لازمه
ومش أزمه اني اقولها لكم
بعلو الصوت ملووووش لزمه
ملوش لزمه سؤالكم لو يكون بالغصب
ولا عتابكم لو حيقلب ذنب
ملوش لزمه سماع شكوى
ولا اسمعكوا شكوايا
ولا امسح بالكفوف خوفكم
ولا في خوفي
الاقي قلوبكو ويايا
ملوش لازمه
اقسم بينكو لقمة عيش
ولا لازمني قلوب انا فيها بح مفيش
ولا ابقى النور وعود و بخور
ولا ابقى الحضرة والدراويش
ملوش لزمه
اصاحب ناس بمليون وش
ولا لازمني محبه بغش
ولا أمانكم لو راح القاه هش
ملوش لازمه
اكون في الشده وياكم
جدار صامد
وانا ف حزني اكون وحدي
ابره ف قلب كومه قش
ملوش لزمه
اعيش بينكو في توب اراجوز
يضحكم …ومبيضحكش
ولا ابقى حكايه للفرجه
في عرض ستايره مبتنزلش
ملوش لزمه
اعيش عمري بطعم الموت
وانا قلبي لسه حي ما ماتش
كان كل حلمي ف حضنكم
ابني لي عش
حياتي ياناس مهيش لعبه
ولا آخرها الملك بيكش
