إبداعات

شئ اتهد

شعر – قوت القلوب:
لما الشمس بتحجب نورها
واللا تلمه ف كهف العتمه
واللا ف عز أغسطس تمشي
او تحدف ع الأرض جليد..
يبقي أكيد..
شافت شكل الناس اتغير
وقلوبهم ما بقتش قلوب
قلب بيشبه قالب طوب
قلب بيكره
قلب بليد..
لمت كل خيوطها الدهبي
سابت شهر أغسطس قاعد
بين جدران البرد وحيد،
واللا أكيد..
حست ظلم الناس للناس
أو ظلم العالم للأرض
شافت مد ف عز الجزر
شافت جزر ف عز المد
شافت شجر الحنضل دايس
علي جثث الأزهار والورد
حست شئ ف الناس اتهد
كان له طعم..
كان له لون..
حست ان العالم أصبح
عالم تاني غريب مجنون
إللي يغش ف أبشع صوره
واللي بيغدر
واللي يخون..
شافت ناس ع الناس بتهون
والأحلام كلها ف الضد
حست شئ ف الناس اتهد
يمكن أجمل شئ جواهم
الطيبه اللي تمللي معاهم..
صبحت شر!
شجر الحنضل صب المر
علي وش الضي المتسرسب
خافت منه الشمس وهربت
دخلت كهف الضلمه الواسع
خبت نورها هناك واتدارت
قالت ح اظهر..
لما الناس فعلا تتغير
أو ح افضل..
ف الركن الضلمه.

مقالات ذات صلة

زر الذهاب إلى الأعلى