إبداعات

طاهر

شعر- عبداللطيف مبارك، مصر:

إلى طاهر البرنبالى

انا اللى واقف على جمر الوطن بأغلى

لا عرفت بُكره ف ميعاد

ولا هيجيبوه .. بدرى

لا عرفت شمس المغيب

ولا آهة ..

دمعة نحيب

فوق الخدود ..

تجرى

***

سلمت نمرى ..

زودوها ونقصوا

عُمرى يدوب بالدقايق

خلصوا

إدعولى

وإدعوا للوطن يبقى

ساعة الممات ..

هاتوا ف تاريخي وفصصوا

***

أنا عشت بالاسم الجميل

طاهر

ولد يشقى على الأرض

ويعترض ..

يتظاهر

عشقت ناس طيبه ..

ف العمر أهم عدوا

ونيل رماني فوق جسر الوطن …

ظاهر

***

وش النشيد

فوق ضحكتي توأم

أخدوه يقاسموا الفقير ..

بأيادي لا بترحم

عشقي فى ملك الإيد

أنا طايلُه

متأخذونيش

أنا أصلى بيه ..

بأحلم

***

ناولونى فرحة ملايكه ..

يثبتوا قدمى

ناولونى جرحى ..

بطلوه .. يدمى

ناولونى قلمى ..

لجل م أكتب بيه قصيده

جسمى لفُه النيل … وروحى

شاهده م فوق …

هرمى

مقالات ذات صلة

شاهد أيضاً

إغلاق
إغلاق