شعر- سارة زيادة:
دق الودع
وارشق سهامك جوه صدر الخوف
لملم جراحك واوعي حد يشوف
كل الوجع….. مكشوف
ولسه بتعافر
فتح وفووق
احلم تعييش
بكراك … مفيش
والحضن خيش
ومعدش متبطن حرير
والباقي م العمر العفي حبه ساعات
صادق عيونك راقب الاحداث
غربل سنين العمر
وداري ف حيطانها الدموع
البت مكسوره
فستان هواها خيطانه مربوطه بشموع
ألبوم جراح ف حدوده ١٠٠ صورة
صندوق خشب والسوس ضفاير مجدولين
افتح قميصها وسيبها ضد الريح
كل اللي فات أصعب من اللي مجاش
غمض عنيك
ماتشوفش مين مظلوم
ولا اللي فات حقه
لا صوته شق السما ولا انشرخ حلقه
افرد خطاوي الصبر فوق كل اللي عدى ومد
قطع خيطان العنكبوت نهر الحنين اتسد
اترك مكانك من على صدر النهار
واتفطم قسوه
قلبك نبي مع انه نون نسوه
عيد المخاض
عيش تاني لو عافيه
بحلق ف ضي الشمس
عين اللي خاف طافيه
