شعر- وفاء بغدادي:
يرضيك كده بذمتك
ينفع تموت وروحى عايشه بضحكتك
ينفع تغيب
والشمس واخدة عنيك دفا
طب سيبنى تحت الشمس حبة
يمكن ينوبنى م الشفا
بلسم يحل محل عينك
لما بتاخدنى وتتقفل
يرضيك كده
متغبش تانى
البحر ف بعادك أنانى
والضى ف عيونى عشانك
مربوط برمشة حضرتك
يرضيك كده بذمتك
إتقل براحتك
أنا قلبى أتقل بالحنان
أوزن كدة
باوزن مشاعرى بالأمان
القلب مش محتاج ميزان
هتزيد
هزيد
وادخل براحتى م الوريد
فى الدم هبقى بلازمتك
يرضيك كده بذمتك
أرجع بقى
خليك قوى
دا إنت أللى روحك طلعت
من قلبى إحساسى السوى
الدنيا من غير طلتك
قلب باهت سودوى
وميت قصيدة بتموت قصادى
ترجع لو اسمع ضحكتك
يرضيك كدة بذمتك
