إبداعات

أبين زين

شعر- سوسن رمضان:
ابين زين واقرا الودع
عشقاك انا يادي الجدع
مع اني ايه ؟!
من يوم ماجيت للدنيا
يعشقني الوجع
ولا عشت فوق الحِجر
ولادُقت الدلع 
انا امي كات تقرالي عدية ياسين
كانت تقولي
روحك خفيفة محمحمة 
وكانها ريشة ف طرف حمامة مغَربة..متغَربة
ساكنة هناك ..علي ضي نجمة وحيدة
عاشقة للقمر ..تستني نور الفجر
لجل ماترتاح م الانتظار ومن السهر
كانت تقولي 
داري ياغالية علي شموعك تقيد 
تنشف دموع ليل الاسي ..ويجيكي عيد
والله يااما لسة خدودي بتتروي بالملح
ولاقلبي خالي من الوجع
ولا طابلي جرح 
وليلاتي بفتكرك وانا الاهه
بتشرخ قلبي شرخ 
نفسي ف ايه 
نفسي يتحقق دعاكي
والقي اللي يحضن قلب روحي
اللي يمسح دمعة الايام من فوق جروحي
ارقيني يااما وانتي علي باب السما
وادعيلي تاني قلبي يعشق بالوما
قلبي يعشق بالوما

مقالات ذات صلة

شاهد أيضاً

إغلاق
إغلاق