إبداعات

سؤال

شعر:علا بركات محمد
******
وسألتك ليه السما والنور
نازلين للشجر اللي ماورقش
وازاي بتلومني عشان باحلم
أحلام بتقول مش مسموحة
وازاي بتلوم نقطة اندلقت
م اللون الأخضر ع اللوحة
بإيدين بتدرو على بكره
مع إن الليل خلفية عمر
خطين يرسموا أحلام خضرة
واصلة لحد حدود الشمس
وانا بس حاولت إني أتمنى
ماحاولتش أفسر حلم اليوم
ماقصدتش أأول رؤية أمس
ماقصدتش أبدا أرجع شيء
مفقود مكتوبله لابد يضيع
والله ماباقصد أخلي خريف
الحلم التايه بينا ربيع
معلهش خيالي ماهوش محدود
أنا عارفة الحلم ف أرض الواقع
مش موجود. .
قطارات العمر اللي انطلقت
لجهات مختلفه ماهيش هتعود
…….
يا طريق مكتوبلي ومش هامشيه
أشواك الورد اللي بيملاه. .
الخطوة عليه بتدوب إحساس
ونزيف النبض التايه فيه..
ممزوج بآهات الفرح معاه
يا نزيف بيمد قلوبنا حياه
وكتير متاهات بتاخدنا بعيد
وكتير حكايات بتاخدنا إليه
وأنا هاعمل إيه ف جيوش الصد
وسلاح مايصيبش إلا قلوبنا
لو كان بإيديا سنين البعد
أنا كنت لاغيتها من الأيام
وبنيت من قلعة صمتي كلام
وقفلت طريقك ع الأوهام
ورسمت الشوق صفين إحساس
بيشوفوا عيونك كل الناس
ويباتوا ف حضنك لما الليل
يطلعله نهار موصول المد
ويطل بشمس مدارها عنيك
وتمد شعاعها في روح لياليك
وتبات في عنيك. .ماتبانش لحد
يا حكاية عشق مالوهش حدود
وطريق مفتوح ع الروح. .موصود
قطارات العمر اللي انطلقت
لجهات مختلفه ياريتها تعود
قد تكون صورة لـ ‏‏‏أحذية‏، ‏طبيعة‏‏ و‏شجرة‏‏

مقالات ذات صلة

شاهد أيضاً

إغلاق
إغلاق