إبداعات

الناس فصول

شعر- ساره زياده:
الناس فصول
فيهم بشر زي الشتا
تماثيل جليد
مفهومش روح
ليلهم طويل بارد بروده قلبهم
ولا فيش لحاف يفرد دفاه
ع الجته لما الريح تزيد
ف تبعتر الاحلام على طين الطريق
وناس كدا زي الربيع
تغمز بعينها
تتفتح الازهار على الوش الحزين
والضحكه ترقص ع الغصون
من فوق اماني الروح بتطرد كل جرح
تكنس تراب الحزن وتزيح التعب
ترجع تنور ضلمة القلب الصفيح
يصبح دهب
وناس ولا احلى
من الصيف الشقي
نظره عيونها فيها ريحة اليود
قلوب بطيبة أهلنا ايام زمان
رصيف كورنيش
بيلم كل الناس
بيوت و قصور
ع الرمله مرسومه بضحكة طفل
شمسيه ومنصوبه في عين الشمس
وموجه تحضن قلبنا بشويش
ترجع وتنحت صخره الاوجاع تبوش
وناس كتير زي الخريف
أشجار بتسلخ جلدها
وكأنها تعابين كبيره مفضَّضه
تعصرنا وتمدد ف شق الروح
تحمَّر القلب ف عيون الليل
وتدوقه ألوان شقا ومرار وقهر
وتأزز الاحلام … نفوق
ويتوه ما بين العتمه مليون فجر
وكفوفنا لسه متبته ف خيط النهار
بتشد نور
تتفتح الشبابيك حياه

مقالات ذات صلة

شاهد أيضاً

إغلاق
إغلاق