إبداعات

كونشيرتو

 شعر- سارة زيادة:

قال جاي يقول
( الشتا مش ليك)
وانا ايه كان ليا غير الامطار
الخوف امطار
ودموع امطار
وطوفان بيقلع شجر الروح من جِدر الجدر
وعيون بتفنجل ف العتمه
أنفاس منهوشه بضافر الغدر
وصوابع بتعد الاوجاع
ف ليالي تتكتك م السقعه
وحيطان مسنوده بدعوة ام
وحيطان واقعه
الناس عماله بتشغي هناك
وانا لسه لوحدي مع العصافير
لو كل ذنوبي ان انا انسان
ف الصفحه التانيه من ال
مكتوبه بتاء التانيث
ف خلاص انا دوبت من التكفير
مدفونه ف بير
مع صوت سجان حواليا يرن
مع ان الحبل قطعته زمان
من غير ما اسنه القلب إتسن
وعيون ممدوده بخيط للسما
تتمنى تطير
محبوسه البت مع العصافير
والغربه تقرب وتقرب
والوحده تجوع
تفترس القلب المتداري ف توب الاشعار
ينتابها سعار
تتهجي بصمت سكات الليل
ولحد ما يطلع ليها نهار
الشتا كان ليها
علشان تتخفي دموعها الغاليه بين الامطار
الشتا ضليله وصوت بيونس روح الروح
امطاره دي نور
بتبل القلب وتطفي النار
الشتا افكار
بتاخدنا بعيييد
لمكان مفيهوش ناس م السوده
ونحقق احلام موءوده
نجري مع الريح والشتا بجماله يغطينا
من غير ما نخاف
من غير أسرار
الشتا دا حوار
اغنيه محدش غناها
ولا لسه انكتبت معانيها
الشتا دا كمانجا وكونشيرتو
مزيكا بتخرج وحديها
اوركسترا بتعزف مع موتسارت
الشتا مش ليكو انتو يا فرافير
الشتا دا هويس
ولا ينفع يوم يحبسه شِباك
الشتا ملضوم حوالينا شِباك
بتسيبك كل الناس وتنام
وحيفضل بس الشتا وياك

مقالات ذات صلة

شاهد أيضاً

إغلاق
إغلاق