شعر- ساره زياده:
الشمس بترفع ديل الفستان
وتنط فتحضنها إيديّه
وانا عيني وراها
بتفرّج على أروع سحر
إزاي من بين ملايين الخلق
اختارها تبات ف عيونه البحر ؟
عواميد النور بتمد لسانها
وتغيظني ساعات
ف احدف على عينها الطوب واطير
على باب السما
شايفه الأفيشات
انا فيها البطله بدال (شريهان )
أصل انا ف الدنيا يا دوب … دخان
ولا عمري حكون للبحر الشمس
واروح لعيونه ليلاتي وأبات
أنا كنت زمان دايمًا خايفه
والخوف كرابيج على عمر حزين
والملح المرشوش فوق منه… بينز عذاب
والليل كدّاب
أحلامي سراااب
ويومياتي بدور لسؤالي
على أي جواب
ليه كل حلم بنحلمه
يصبح كابوس ؟
ليه كل سكة قصادنا
محتاجة لفانوس ؟
ليه اللي عايز يترفع
على نبض قلب الناس يدوس ؟
صاحبي الشتا
دايمًا ياخدني لذكريات اتعلّقت ع المشنقة
ويقول لي مش كل الفراش
لازم ح يخرج من خيوط الشرنقة
واللي بيتمنى الحياة
لازم هيدفع التمن
بس التمن غالي أوي
ذل ومهانة
وكرباجين فوق الحساب
الكُل نفسه يعدي لو من خرم باب
