إبداعات

ملح عرقك فوق لسانى .. دوا

شعر – عبداللطيف مبارك، مصر:

ملح عرقك فوق لسانى .. دوا

قالت كدا

فتطل دهشه م بين وشوش الخلق

وإنتى بترسمى

آخر ألم

بيدوب على جرحى

إللى شاريله الوجع

الضحكه منك بلسمى

فأنا الطريد المحتمى

وأنا الشهيد المنتمى

رغم إن فيكى معصمى

مربوط على خد الصوارى

بعشقك

معرفش أدارى

جوّه نقشه بكره ف بيوت الغلابه

دوّبينى جوّه منك

دوّبى ف قلبى الكتابه

لسّه بعشقك ليكى حضنك

فرح نيلك

وأعشقك ضىّ ف عيونك

جوّه موال الربابه

***

وأعشقك فوق نهر دجله

حلم بيساوى السحابه

لجلن م يمطرها تاريخ

تحيى ف عضام الصحابه

يا صحابه

حلمى جوّه القدس لسّاه يرتمى

بعدتى ليه وتهمهمى

وتغمغمى

فأنا الطريد المحتمى

وأنا الشهيد المنتمى

رغم إن فيكى معصمى

مربوط على خد الصوارى

وأعشقك

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً

إغلاق
إغلاق