شعر- عبد اللطيف مبارك:
طل الألم
من تحت أعتابى
فرد القلوع ف القلب
صد أبوابى
***
يا دمعة الحمل إللى شارد م القطيع
لسّاك تحز ف حبال البُكا
وتضيع
لسّاك تحادى
الفرحة موش جواك
لمّن ف سوق النخاسة
تنخرط للبيع
وتشد ف ركابى
***
إحنا إللى باعنا
شخص موش عادى
طوّق رقابنا
بالشراك والجنس
لجلن م نفهم
فض المسألة … ونحس
إن البعيد … سادى
***
ياوطن .. زادى
كترت عليك النخاسين .. القوادين
البصاصين .. الملتحين بالغش
كترت عليك الفهلوية .. البهلوية
البوهيجية
والملك بيكش
كترت عليك الأعادى
ياوطن … زادى
