شعر: رجاء حسين
أنا الموجة في ليل بحرك واسمي يجري في دمك
أنا نورس عشق سحرك وغنى في الهوى اسمك
أنا الناي اللي يوم فارقك وشايف في العيون دمعك
وعاش وحده سنين العمر بيحلم بالهنا في حضنك
وعاد يسأل عن المكتوب بكى لما انكسر غصنك
بكت وياه عيون البحر وداب الصخر في رملك
ويدعي م الحشا قلبي على كل اللي يوم كَرَهك
ومن خانك ومن ظلمك ومن غيرفي يوم شكلك
ده مهما غيروا وشك وحذفوا كل عناوينك
حتبقي للجمال عنوان تيجان الحسن عارفينك
أنا في الفن درويشك وقصة حب بتعيشك
ويوسف لما كان عاشقك وعشَقك ليه كمان وكمان
أنا المعزوفة من وترك يا نغمة حزن لامساني
وسامعاك في حضن كمان
أنا أغنيتك قالها في يوم بيرم
ورددها
صدى صوته في كل مكان
أنا لوحة بإيد فنان رسمها يوم على موجك
ياحلم جميل لإسكندر نبوءة حب وعشقها
عليك بقلبه شاور ليه؟! وقلبه كان مصدقها
يامخطوطة من الأحلام دينوكراتيس يحققها
شوارع شكلها لكن في حضن قلوب تزوقها
ولو حكم الزمان بفراق مافي قوة تفرقها
هيباتيا فكرة صعب تموت ونار الجهل تحرقها
كفافيس قالها لنا زمان وقالها كل عشاقها
مدينتي وحبها في الدم خلايا تدوب في أشواقها
وأحلف والله ما باليد في دمي ربنا خلقها
وأحلف والله ما باليد في دمي ربنا خلقها
مدينتي تبتسم للشمس وشمس الكون تصدقها
وضحكتها! وضحكتها
تصحي الشمس في مغربها ومشرقها
ومين قال المدن أحجار؟!
ومين شايف شوارعها خطوط وتراب؟!
ولو فارقتَها تصبح في لحظة سراب
مدينتي لها قلب وروح ودايماعايشة جوايا
بتفاصيلها منين ما بروح ألاقى عشقها حكاية
تدفيني في عز البرد دفاها عمري وهوايا
وشمس الدنيا لوقسيت بنار الهم في سمايا
تكون نسمة ترد الروح وأسمع لها ضحكاية
وأرجع موجة بتغني على شط بحرك مرسايا
