شعر -حاتم مرعي:
عيل بيرمح فى الفصول الضلمه
ويفك فى سنين الملل شلنات
رنة خطاوي الطفل لما يموت
وجميع بيبان الجنه مقفوله
عصافير ضلوعي
تبتسم وتغيب
زي الموسيقي
الطالعه م الراديو
عقلة صباعي بتنسرق مني
والدبه بتزف العيال فى البير
وبتغني
أحاول أخرج من شقوق الصوت
طفل بينام على كتاف الشوارع
ويغازل الأحلام فى حوش المدرسه
بشويش أعدي ع الرصيف البارد
أرسم حدود الكون على أدي
والعب لوحدي بالحروف
من خوف بيسرق نقشة الحنه
لجنه بتقايض على الدخول بالشقا
وانا.. ماملكشي غير الزقزقه
يمكن يكون العمر مش مطلوق
من باب حديد مقفول على دمي
وارجع محمل ضهري
بسقوط النشيد
لاحيلتي شيئ م اليقين
ولا م السلاح
” أقسمت باسمك يابلادي فاشهدي ”
إني مانيش عاصي ولافدائي
لكني مرغم ع البكا
ساعة الهتاف .
