شعر- منى عبد الرحمن:
(لو كنَّا عيال)
(كان ممكن نقتل أوجاعنا)
بِلَفِّةْ مُرجيحة ونَط الحبل
وبقصة شَعر جديدة
مع الفستان
ألوان……. ألوان
ألوان السما دايما بيضا
وبترسم على جدران القلب
حلم بيرقص
ويرقَّص كل حيطان الروح
من غير ماتروح
لآهات وجروح
آااااااه… لو كُنَّا عيال
كنا اتلفينا بغنوة حرير
جوَّه الألحان
ويَّا المشاوير
وجرينا.. جرينا.. بأشواقنا
وبسرعة الدنيا هتلحقنا
وهتغزل مِ الفرحة أغاني
حب وأشواق.. نجري ونلعب
والبُعد فراق
لاء.. فين البُعد
البَرق الرَّعد وَلَد أمطار
التلج اتحوِّل بلا أعذار
لمشاعر نار
يااااااااااه…
لو كنا عيال
