إبداعات

هروب

شعر- هناء الكومي:
أنا بهرب منك ف منامى
لما اقفل عينى على صورتك
وساعتها بشوفك قدامى
بتجينى وتصحى طفولتك
وتقولى بحبك بشويش
والقلب معاك يقلب عيل
واشوف ف عنيك لحظة طيش
تخطفنى ف حضنك وتميل
لون عينك بحر بطعم الشوق
جواهم سحر بيحينى
وبحس اننا طايرة لفوق
والفرحة تبان لمعة ف عينى
السما بتنقط حلويات
ولا أنا وياك روحت الجنة
الحب ف أحضانا اهو بات
وحروفه ف قلبى بتتغنى
أنا أصلا بيك شميت نفسى
وحياتى قبلك كات مرة
مسجونة ف أحزان الماضى
ومعاك دلوقتى بقيت حرة
وف قربك قلبى بيطمن
وبيعزف الحان م الفرحة
وحياتى دايما تتلون
مع لون الفستان والطرحة

مقالات ذات صلة

شاهد أيضاً

إغلاق
إغلاق