شعر- ساره زياده:
الكل واقف في المحطة
والقطر بينادي
ع اللي بيهرب من جراح قتلاه
واللي بيحسب غربته دي حياه
واللي مسافر كل زاده دموع
أحلام قديمة
خاف ياخدها معاه
وانا قلبي سلّه من ازاز
جمعت صور لقلوب شجر
لكن في اوهام الخريف
ملمومه كل الذكريات حلوه ومرار
ارواح تاعبها الانتظار
رعباها صفارة الفراق
كل العيون متكحله بالخوف
الكل واقف ف المحطه
والقطر بينادي
يا هل ترى اللي على القضبان
ورق جوابات
ولّا نزيف ؟
أوقات يكون البُعد رحمه
وكتيييييير …. كتير
يكون البُعد زي السيف
