إبداعات

مش عدالة

شعر- حنان شاهين:
اني اجي الدنيا و امشي
بدون ما اسيب في الكون اثر
قلب فاني في دنيا فانية
زي ملايين البشر
مش عدالة
تبقى روحي حاطة سكر
جوا مشروب الامل
والقى عمري كله فات
زي كاس فجأة انكسر
مش عدالة
ان بعد الليل ما ليل اكتشف
اني خارجة من متاهة
و اني عشت بادور في دايرة
جوا دايرة
دايرة سموها القدر
دايرة ساحبة مني روحي
في بير غويط
شايفة جوا البير ضحية
سامعة جوا البير عياط
وقفوا كل الساعات
لسه ما بلتش ريقي
لسه ما شبعتش حياة
لسه عايزة فرصة تانية
ابقى فيها بهيئة تانية
ابقى روح حرة و خفيفة
مش جسد مربوط بصخرة
صخرة سدة كل حارة
و كل شارع
صخرة ربطاني في كنيسة
او في معبد او في جامع
ماشية طول الوقت خايفة
شايفة طول الوقت غول
غول وراي بيطاردني
غول سابقني و غول راصدني
و غول بسن سنانه ليا لما اموت
شايفة شجرة توت هناك
عايزة اشرب من عسلها
و كل دول مانعني افوت

مقالات ذات صلة

شاهد أيضاً

إغلاق
إغلاق