شعر- محمود عبد الرحمن:
ماريه انا وبحرك بنتلاقى
وبير مسعود بيجمعنا
ويعزمنا على فريسكا
وموجه شقيه تعاكسنا فتعكسنا
وندي ضهرنا للناس
ونحلم ايه بكره حايجي معاه
امل شايل لنا إحساس
بان لقانا متوضي
و ساجد ساجده مقبوله لرب الناس
انا وشوشت أوجاعنا
عشان تبعد ولو ساعتين
وموج البحر لو باعنا
حنفضل ف الهوى حبيبين
وبين سطرين
سطرت العشق في غنوة
قالوها اتنين
انا وانتي اللي غنينا وحبيبنا
ومانسينا نكون طرفين
عشان نلضم امانينا ن
حاصر كل خوف فينا
ولو ببابين
منشبهشي ف أرض الله
ولا عاشق ولا عاشقه
وريحة اليود بتشبهنا
وقصه ف قلبنا راشقه
عشان قصتنا مغزوله
بتوب جنيه مسجونه ف سابع ارض
عمل مدفون بيحمينا
ويحفظنا كحفظ العرض
دا حتى الشمس غمزتلي
وهيا مروحه بدري
قالتلي السر متخافشي
معايا ومين بقى يدري
يابو العباس انا زيك كمان درويش
وحلقة ذكرنا غنوة وطقم حشيش
منا مفتون ببلطيه
وقلعة بحري جنيه جابتلي شاويش
مفيش عشاق مزاروهاشي
واخدوا فلوكه ع الماشي
لكن ماشي ومفيش بقشيش
برغم سكون هوى النزهه
وحالة فرجه م الزوار
لكن احساسي جواها
بأنك مهرة م الثوار
اكيد ثورة على انوثه
قالتلك انتي محسوسه
وفوق ستانلي ممسوسه ب100 جني
لكن عاشق
يانص جمال وانا نصه
يروح الشعر مين نصه
ياعشق نزار في تخريفه
ياليلى قيس ف تحريفه
نصوص الشوق ده
سارق مني احساسي
وواخد سطر كراسي
عشان ليلى ميعرفشي
أننا عندي 200 ليلى
بشوفهم فيها وحديها
ووحديها معاها رموز لاشعاري
ووحديها تحدد جنتي وناري
ووحديها مقام زواره م الشعراء
قصايد عشقهم سافله
وحالفه تكون من الأمراء
سكنها ريا وسكينه
وحتة بت مسكينه
وانجي ف قصرها ملكه
تشوف البحر والمينا
ف رمله شط كليوبترا
ده قلبي وقلبك اندفنوا
وسهرايه غزل صافيه
على إمة سان ستيفانو
بحبك موت…….
ولا اسكندر ولا غيره
انا والمٌّن عاشقينك
ومين غيره حيكتب فيكي
والعنوان ماريه يا بنت يا شقيه
وبحرك سجني والسجان
