شعر- منى علام:
من ديوان”كلام اخرس”
وبعد التحية، وبعد السلام
عيوني تطوفلك كإنك مقام،
بحبك وحبك ف قلبي ما نام
وحتى وانا صاحية
عيني تشوفك كأنك منام
ف عشقك رسالة، كإنك حكاية
كإنك رواية… وقلبي الكلام
بتأمرني أسكت وتقرا عيوني
بتعشق هدوئي، وتعشق جنوني
وتضحك لغيرتي، تطمن ظنوني
ف غيرتي معارك، وحضنك سلام
فليه فجأة ترحل،
وتهدم أساسي،
فأنزل حطام
عليك عيني تسأل،
وليه انت ناسي،
ولا مرة تبعت لقلبي السلام
ده كان موتي أسهل،
يا أهلي وناسي،
وحب وغرام
أنا نفسي أمسك لقلبي الزمام،
لكني ف حصة بعادك ناقصني العلام،
بآمن بحبك؛
فليه انت تكفر، وإنت الإمام؟!
