شعر – محمد التمساح، مصر:
الليل بينهش
بهجة اللمه
طير الغياب لساه
مطواش الجناح
لسه الرياح
سايقاه لفين مايروح
والانتظار صبار وحيد
صحبة الخلان
ياباب القلب
بتوارب لمين الروح
ريح الصحاب
مبقاش يهفهف
على عش الوليف
مبقاش يطبطب
على أن الوجع
لما استباح الجرح
فى الروح السكن
أصبح وطن للانكسار
الغربه مش فى البعد
وغياب السفر
الغربه فى الوحده الونس
والقرب المستحيل
يانهار صحابى
شقشق النوار
خلى الندى
يطرح على خدودى
رج الحياه
زلزلها والقفنى
لما انفلت
من شجرة الحرمان
خدنى ما بين
راحتينك الجنه
نيمنى فى ضلوعك
وضم عليه بالأحضان
يمكن تعود الروح
لعود يابس
ويرجع تانى ترياقك
الى عروقى
يخضر قلبى وينبت
غصون بكره .
